पोखरामा लागू औषधसहित एक व्यक्ति पक्राउ

पोखरा ।

पोखरामा प्रहरीले ठूलो परिमाणमा लागू औषधसहित एक जनालाई पक्राउ गरेको छ। प्रहरीका अनुसार गत भदौ ९ गते दिउँसो करिब २ बजे लागू औषध कारोबार भइरहेको भन्ने सूचनाका आधारमा लागू औषध नियन्त्रण ब्यूरो शाखा कार्यालय पोखरा, जिल्ला प्रहरी कार्यालय कास्की र वडा प्रहरी कार्यालय बैदामको संयुक्त टोली खटिएको थियो।
उक्त टोलीले पोखरा–८ इन्द्रपुरी मार्ग बस्ने ४६ वर्षीय रमेश थापाको घर कोठामा खानतलासी गर्दा ब्रुफिनुर्फिन १६१ एम्पुल, डाइजापाम १३५ एम्पुल, फेनेरागन १६४ एम्पुल गरी जम्मा ४६० एम्पुल, गाँजा ४ किलो १०० ग्राम, डिजिटल तराजु १ थान र मोबाइल १ थान बरामद गरेको जिल्ला प्रहरी कार्यालय कास्कीले जनाएको छ।
बरामद गरिएको लागू औषध र सामग्रीसहित थापालाई नियन्त्रणमा लिएर सम्मानित कास्की जिल्ला अदालतबाट ६ दिनको म्याद थप गरी लागू औषध सम्बन्धी कसूरमा थप अनुसन्धान भइरहेको प्रहरीले जनाएको छ।