पोखरा ।
आईसीसी टी-२० विश्वकप एसिया तथा ईस्ट एसिया प्यासिफिक छनोटअन्तर्गत सुपर सिक्सका खेल आजदेखि सुरु हुँदैछन् ।
नेपालले आज युनाइटेड अरब इमिरेट्स युएई विरुद्ध प्रतिस्पर्धा गर्दै छ ।
यो खेल ओमानको अल अमिरेत क्रिकेट रंगशालामा नेपाली समयानुसार दिउँसो सवा ४ बजे सुरु हुनेछ ।
प्रतियोगितामा नेपाल समूह ‘बी’का दुवै खेल जित्दै सुपर–६ मा प्रवेश गरेको हो ।
नेपालले समूह चरणको पहिलो खेलमा कुवेतलाई ५८ रनले हराएको थियो भने दोस्रो खेलमा जापानविरुद्ध पाँच विकेटको जित निकालेको थियो ।
युएईविरुद्ध प्रतिस्पर्धामा उत्रदा नेपाल लगातार तेस्रो जितको खोजीमा हुनेछ ।
युएई पनि समूह चरणका दुवै खेलमा जितसहित सुपर–६ मा पुगेको हो ।
समूह ‘ए’मा युएईले कतारलाई सात विकेटले हराएको थियो भने मलेसियाविरुद्ध ६ विकेटको जित निकालेको थियो ।
नेपालले सुपर–६ मा रहेका पाँचमध्ये चार टिमसँग प्रतिस्पर्धा गर्नेछ । सुपर सिक्समा नेपालले यूएईसहित कतार, ओमान र सामोआसँग खेल्नेछ ।
सुपर सिक्समा समूह ‘ए’ बाट यूएई र कतार, समूह ‘बी’ बाट नेपाल र जापान तथा समूह ‘सी’ बाट ओमान र सामोआ पुगेका छन् ।
यसपछि नेपालले आफ्नो दोस्रो खेलमा सोमबार कतारसँग खेल्ने छ ।
बुधबार ओमानसँग खेलेपछि सुपर सिक्सको अन्तिम खेलमा शुक्रबार सामोआसँग खेल्ने तालिका छ ।
नेपालले समूह चरणको खेलमा जापानसँग खेलेका कारण सुपर सिक्समा जापानी टोलीसँग खेल्न पर्ने छैन ।
यो चरणमा हुने १२ खेलपछि शीर्ष ३ स्थान हासिल गर्ने टोलीले २०२६ फेब्रुअरी र मार्चमा भारत र श्रीलंकामा हुने विश्वकपमा स्थान बनाउने छन् ।
प्रकाशित मिति २०८२ असोज २६ गते आइतबार ०९:०२
