पोखरा ।
आईसीसी टी–२० विश्वकप एसिया तथा ईस्ट एसिया प्यासिफिक छनोटको सुपर–६ अन्तर्गत नेपालले आज कतारसँग खेल्दैछ ।
ओमानको अल अमिरेत क्रिकेट रंगशालामा यो खेल नेपाली समयानुसार राति पौने ९ बजेबाट सुरु हुनेछ ।
सुपर सिक्सको आफ्नो पहिलो खेलमा नेपालले हिजो युएईमाथि १ रनको रोमाञ्चक जित निकालेको थियो । यूएईलाई हराएसँगै नेपाल विश्वकप नजिक पुगेको छ ।
हिजोको खेलमा नेपालले दिएको एक सय ४१ रनको लक्ष्य पछ्याएको यूएईले २० ओभरमा नौ विकेट गुमाएर एक सय ३९ रन मात्र बनाउन सक्यो ।
यूएईलाई अन्तिम तीन बलमा तीन रन चाहिएको अवस्थामा तीन विकेट गुमाएर एक रन मात्र जोड्न सक्यो ।
नेपालले समूह चरणको पहिलो खेलमा कुवेतलाई ५८ रनले हराएको थियो भने दोस्रो खेलमा जापानविरुद्ध पाँच विकेटको जित निकालेको थियो ।
योसंगै नेपाल आज लगातार चौथो जितको खोजीमा छ । कतार समूह चरणमा मलेसियालाई पराजित गर्दै सुपर–६ मा पुगेको हो ।
समूह ‘ए’मा कतार युएईसँग पराजित भएको थियो भने मलेसयालाई ८ विकेटले हराएको थियो । सुपर सिक्समा भने कतार ओमानसँग ३४ रनले पराजित हुन पुग्यो ।
यी दुई टोलीबीच अहिलेसम्म तीन खेल हुुँदा नेपालले २ तथा कतारले एक खेल जितेका छन् ।
अपराजित नेपालको सुपरसिक्समा ४ अंक भएको छ भने कतार अंकविहीन छ । सुपर–६ मा रहेका पाँचमध्ये चार टिमसँग प्रतिस्पर्धा गर्नेछ ।
नेपालले प्रतिस्पर्धा गर्ने टिममा अब युएईसँगै कतार, ओमान र सामोआ छन् । नेपालले आफ्नै समूहबाट सुपर–६ मा आएको जापानविरुद्ध भने प्रतिस्पर्धा गर्ने छैन ।
नेपालले बुधबार ओमानसँग खेल्नेछ भने सुपर सिक्सको अन्तिम खेलमा शुक्रबार सामोआसँग खेल्ने छ ।
यो चरणमा हुने १२ खेलपछि शीर्ष ३ स्थान हासिल गर्ने टोलीले २०२६ फेब्रुअरी र मार्चमा भारत र श्रीलंकामा हुने विश्वकपमा स्थान बनाउने छन् ।
प्रकाशित मिति २०८२ असोज २७ गते सोमबार ०९:२६
