पोखरा ।
नेपाली प्रो टेनिस खेलाडी अभिषेक बाँस्तोलाले भियतनाममा हुने यूटीआर प्रो टेनिस टुर खेल्न जाने भएका छन् ।
पाखरेली टेनिस खेलाडीले डिसेम्बर ८ देखि १४ तारिखसम्म हुने टेनिस टुर खेल्न लागेका हुन् । यसअघि उनले भारतको बेंगलुरु यूटीआर प्रो टेनिस टुर खेलेका थिए ।
यो प्रतियोगिता विश्वका उत्कृष्ट ३ हजार खेलाडीमध्येबाट आमन्त्रण गरिएको खेलाडीको मात्र सहभागिता हुनेछ ।
हालसम्म अभिषेकले २२ देशमा पुगेर टेनिस खेलिसकेका छन् । अभिषेक आईटीएफ विश्व वरीयतामा अटाएका नेपाली पुरुष खेलाडी हुन् भने यूटीआर प्रो सिरिज खेल्ने पहिलो नेपाली हुन् ।
उनले अमेरिकामा छात्रवृत्तिमार्फत एनसीएए डिभिजन–१ मा खेल्ने अवसर पाएका थिए ।
जसले विश्व वरीयता पूर्व नम्बर १ खेलाडी नोभाक जोकोभिच, एन्डि मरेलगायत एटीपी तथा डब्लूटीएका खेलाडीको हिटिङ पार्टनर समेत गरेका थिए ।
पोखरामा रहेर १३ वर्षको उमेरदेखि नै अन्तर्राष्ट्रिय प्रतियोगितामा सहभागिता जनाउँदै आएका अभिषेक हाल अमेरिकामा टेनिस प्रशिक्षण लिइरहेका छन् ।
सन् २०२१ देखि उनले यूटीआर प्रो सिरिजका १३ बढी प्रतियोगितामा भाग लिइसकेका छन् ।
प्रकाशित मिति २०८२ मंसिर १७ गते मंगलबार ०७:५६
