साफ महिला क्लब च्याम्पियनसिपको उपाधिका लागि आज एपीएफ र इस्ट बंगाल खेल्दै

पोखरा ।

साफ महिला क्लब फुटबल च्याम्पियनसिपको उपाधिका लागि आज सशस्त्र प्रहरीको एपीएफ क्लब र भारतको इस्ट बंगाल क्लब खेल्दैछन् ।

खेल काठमाण्डौको त्रिपुरेश्वरमा रहेको दशरथ रंगशालामा बेलुका ५ बजे शुरु हुनेछ ।

इस्ट बंगाल ४ खेलमा ३ जीत १ बराबरीसहित १० अंक जोड्दै शीर्ष स्थानमा र समान खेलमा २ जीत २ बराबरीसहित ८ अंक जोड्दै एपीएफ दोश्रो स्थानमा रहँदै फाइनल पुगेका हुन् ।

लिग चरणको अन्तिम खेलमा दुवै टोलीले गोलरहित बराबरी खेलेका थिए ।

दक्षिण एशियाली फुटबल महासंघ (साफ) ले पहिलो पटक आयोजना गरेको च्याम्पियनसिपमा नेपाल, भारत, भुटान, बंगलादेश र पाकिस्तान गरी ५ सदस्य देशका लिग विजेता टोली सहभागी छन् ।

साफ महिला क्लब च्याम्पियनसिपको पहिलो संस्करण गएको मंसिर १९ गतेदेखि काठमाण्डौमा शुरू भएको हो । उपाधि जित्ने टोलीले १० हजार र उपविजेताले ५ हजार अमेरिकी डलर प्राप्त गर्नेछ ।

बाँकी तीन टोलीले समान २ हजार अमेरिकी डलर पाउनेछन् ।