पोखरा ।
अर्को महिना थाइल्याण्डमा हुने एसीसी एसिया कप राइजिङ स्टार्समा नेपाली महिला क्रिकेट टोलीको कप्तानी पूजा महतोले गर्ने भएकी छिन् ।
नेपाल क्रिकेट संघ (क्यान)ले पूजाको कप्तानीमा खेल्ने टोलीको घोषणा गरेको हो । नियमित कप्तान इन्दु बर्मा चोटका कारण मैदान बाहिर रहेपछि पूजाले कप्तानको जिम्मेवारी पाएकी हुन् ।
आईसीसी महिला टी–२० विश्वकप छनोट अन्तर्गत गएको हप्ता स्कटल्याण्डसँगको खेलमा इन्दु घाइते भएकी थिइन् । पूजा राष्ट्रिय टोलीकी नियमित उप–कप्तान हुन् ।
नेपाली टोलीले आउँदो फागुन १ देखि १० गते अर्थात् (फेब्रुअरी १३ देखि २२ तारिख) सम्म चल्ने राइजिङ स्टार्समा प्रतिस्पर्धा गर्नेछ । प्रतियोगितामा ८ टोली सहभागि हुनेछन् ।
समूह ‘ए’ मा नेपालसहित भारत ‘ए’, पाकिस्तान ‘ए’ र युएई रहेका छन् । बंगलादेश ‘ए’, श्रीलंका ‘ए’, थाइल्याण्ड र मलेसिया समूह ‘बी’ मा छन् ।
राउन्ड रोबिन लिगपछि समूहका शीर्ष दुई टोली सेमिफाइनल पुग्नेछन् ।
नेपालले फागुन १ गते पाकिस्तान ‘ए’ सँग खेल्दै प्रतियोगिताको शुरुआत गर्नेछ । त्यस्तै फागुन ३ गते युएई र ५ गते भारत ‘ए’ सँग खेल्नेछ ।
प्रकाशित मिति २०८२ माघ १८ गते शनिबार १२:५४
