पोखरा— साइबर अपराध मुद्धामा १० महिनाको कैद भुक्तान गरी थुनामुक्त भएका रेशमराज पौडेल ९ड्राइभर रेशम० ले कारागारभित्र चरम आर्थिक अनियमितता, कैदीबन्दीमाथि विभेद र दुव्र्यवहार हुने गरेको भन्दै तत्काल छानबिन गर्न माग गरेका छन् ।
रेशमराज पौडेल (ड्राइभर रेशम) ले ध्यानाकर्षण पत्र प्रमुख जिल्ला अधिकारी रुद्रादेवी शर्मालाई बुझाउँदै कारागार प्रशासनभित्रका १० वटा गम्भीर त्रुटिहरू औंल्याएका हुन् ।
पौडेलले कास्कीका सिडियोलाई बुझाएको पत्रमा कारागारलाई सुधार गृहभन्दा पनि आर्जन गर्ने थलो बनाइएको उल्लेख गरिएको छ ।
कारागारभित्र हुने आर्थिक लेनदेन, उपचारमा पहुँचको अभाव र कैदीबन्दीबीच गरिने विभेदकारी व्यवहार रहेको उनको दाबी छ ।
‘कारागार कैद काट्नका लागि हो कि कमाउनका लागि ? कैदीबन्दीले आधारभूत उपचार पाउने हो कि होइन ?’ भन्दै उनले प्रशासनलाई प्रश्न गरेका छन् ।
ध्यानाकर्षण पत्रमा राजन नेपाली नामका कैदीलाई कारागारभित्रै मुख फुट्ने गरी कुटपिट गरिएको दाबीसमेत गरिएको छ ।
पौडेलका अनुसार भेटघाटमा दोहोरो मापदण्ड अपनाइएको र पहुँचका आधारमा अतिरिक्त सुविधा वितरण गर्ने गरिएकोसमेत पत्रमा उल्लेख छ । ‘सरकारले दिएको घाम र डाँडोको पैसामा समेत किन कमिसन खाइन्छ ?’ भन्दै उनले आक्रोश पोखेका छन् ।
यति मात्र नभई, सरकारी कर्मचारीहरू कारागार आउन नमान्ने र आएपछि जान नमान्ने प्रवृत्तिले भित्रको मिलेमतोलाई प्रस्ट पार्ने उनको दाबी छ ।
कारागार कि लाभ पार्क ?
कारागार ‘लाभ पार्क’ जस्तो भएको टिप्पणी गर्दै उनले कैद र घुसबीचको फरक हराउँदै गएको उनले बताए ।
उनले आफ्नो माग तत्काल कार्यान्वयनमा नगए अनशन सुरु गर्ने चेतावनी दिए ।
‘एक हप्ताभित्र यी सम्पूर्ण विषयमा तत्काल छानबिन नभए आमरण अनशन बस्नेछु, उनले भने, ‘यी सबै बेथिती मैले १० महिनामा देखेर आएको छु । त्यसैले कारागार सुधार गृह जस्तै हुनुपर्छ व्यापारीक केन्द्र होइन ।’
कारागार जस्तो संवेदनशील क्षेत्रभित्र मानव अधिकारको हनन् र आर्थिक भ्रष्टाचारका कुरा बाहिरिएपछि यसले सरोकारवाला निकायको ध्यान खिचेको छ ।
यद्यपी, यस्ता खालका विषय बाहिर आएपनि प्रशासनले विशेष चाँसो नदिएकै कारण आफुले ध्यानाकर्षण पत्र बुझाउन बाध्य भएको उनले बताए ।
प्रकाशित मिति २०८३ वैशाख २४ गते बिहीबार ०६:५५
