पोखरा ।
उच्च अदालत पोखराले आर्थिक वर्ष २०८२÷८३ मा ७५.८८ प्रतिशत मुद्दा फछ्र्योट गर्दै दुई वर्ष नाघेका कुनै पनि मुद्दा बाँकी नराख्न सफल भएको जनाएको छ ।
आर्थिक वर्ष २०८२÷८३ को वार्षिक प्रगति सार्वजनिक तथा सञ्चारकर्मीसँगको अन्तरक्रिया कार्यक्रममा मुख्य न्यायाधीश डा. रत्नबहादुर बागचन्दले न्याय सम्पादनलाई छिटो, गुणस्तरीय र नागरिकमैत्री बनाउन अदालत निरन्तर क्रियाशील रहेको बताए ।
सीमित स्रोत–साधन र भौतिक पूर्वाधारका चुनौतीबीच पनि अदालतले लक्ष्यअनुसार उल्लेखनीय प्रगति हासिल गरेको उनको भनाइ थियो ।
कार्यक्रममा रजिस्ट्रार रामु शर्माले प्रस्तुत गरेको वार्षिक प्रतिवेदनअनुसार आर्थिक वर्षभर अदालतमा जिम्मेवारी सरेका ७५० र नयाँ दर्ता भएका १ हजार ३१९ गरी कुल २ हजार ६९ मुद्दा लगतमा रहेका थिए ।
तीमध्ये १ हजार ५७० मुद्दा फछ्र्योट हुँदा ४९९ मुद्दा बाँकी रहेका छन् । समग्र फछ्र्योट दर ७५.८८ प्रतिशत पुगेको छ ।
रजिस्ट्रार शर्माका अनुसार बाँकी रहेका ४९९ मुद्दामध्ये ३१४ मुद्दा ६ महिनाभित्रका, १७७ मुद्दा ६ महिनादेखि एक वर्षभित्रका र ८ मुद्दा एक वर्षदेखि १८ महिनाभित्रका छन् । दुई वर्ष नाघेका कुनै पनि मुद्दा अदालतमा नरहेको उनले जानकारी दिए ।
क्षतिग्रस्त भवनका कारण सेवा प्रवाहमा चुनौती रहेको अदालतले औंल्याएको छ ।
आवश्यक पूर्वाधार निर्माण र प्रविधि विस्तारका लागि सम्बन्धित निकायसँग समन्वय भइरहेको उपरजिष्टार निल प्रसाद पनेरुले जनाए ।
प्रकाशित मिति २०८३ साउन २ गते शनिबार १२:४१
