पोखरा ।
राष्ट्रिय सभामा नेकपा (एमाले) का सांसद सोमनाथ पोर्तेलले सरकारको कार्यशैली र पछिल्लो समय सिर्जित राजनीतिक भाष्यमाथि टिप्पणी गरेका छन् ।
राष्ट्रिय सभाको बुधबारको बैठकमा बोल्दै सांसद पोर्तेलले विगत साढे तीन दशकमा मुलुकले हासिल गरेका उपलब्धिहरूको रक्षा गर्दै वर्तमान सरकारले ‘प्याराडाइम सिफ्ट’ का नाममा जनतामाथि थोपरेको आर्थिक भार र बेथितिको आलोचना गरे ।
सांसद पोर्तेलले विगत ३५ वर्षमा केही पनि भएन भनी चलाइएको भ्रमलाई तथ्यगत रूपमा खण्डन गरे । २०४७ सालको तुलनामा मुलुकले सडक, विद्युत, स्वास्थ्य र शिक्षामा ठूलो फड्को मारेको उनको दाबी छ ।
नेपालीको औसत आयु ५५ वर्षबाट बढेर ७२ वर्ष पुग्नु, साक्षरता दर ३९ प्रतिशतबाट ७७ प्रतिशत पुग्नु र स्वास्थ्य बीमा जस्ता कार्यक्रम कार्यान्वयन हुनु विगतकै सरकारहरूको दूरदर्शिताको परिणाम भएको उनले उल्लेख गरे ।
उनले भने, ‘२०४७ सालमा नेपालमा ८ हजार किलोमिटर मात्र सडक रहेकोमा अहिले १ लाख ४ हजार किलोमिटर पुगेको छ । २२७ मेगावाट विद्युत उत्पादन हुने गरेकोमा हाल ४१०० मेगावाट पुगेको छ । विगतमा खाद्यान्न निर्यात गर्दा जनता भोकै मर्थे, तर आज उत्पादन दोब्बरभन्दा बढी बढेको छ र भोकमरीको अन्त्य भएको छ । वैदेशिक रोजगारीमा जाने युवाहरूको संख्या गत वर्षको तुलनामा ८ प्रतिशतले वृद्धि भएको छ । यहाँ स्वरोजगार हुन खोज्ने राइड सेयरिङ गर्ने युवामाथि भ्याट थोपरिएको छ । सरकारको आलोचना गरेकै भरमा युवाहरूलाई पक्राउ गरी जेल हालिनु र मन्त्रीहरूले भोट फिर्ता लैजाऊ भन्नु के प्याराडाइम सिफ्ट हो ?’
वर्तमान सरकारले प्रयोग गर्ने ‘प्याराडाइम सिफ्ट’ शब्दमाथि प्रश्न उठाउँदै सांसद पोर्तेलले बढ्दो मूल्यवृद्धि, व्यापार घाटा र युवा पलायनलाई नै सरकारले उपलब्धि मानेको हो भनी जिज्ञासा राखे ।
गत साउनको तुलनामा यस वर्ष मूल्यवृद्धि र व्यापार घाटा उल्लेख्य बढेको भन्दै उनले चिन्ता व्यक्त गरे । सांसद पोर्तेलले आम नागरिकले ग्यास र दैनिक उपभोग्य वस्तुको अभाव झेलिरहेको कुरा सदनमा राखे ।
इण्डक्सन चुलो र बिजुलीको महसुलका कारण मध्यम वर्ग मारमा परेको उल्लेख गर्दै उनले सरकारले जनताको आधारभुत समस्या समाधान गर्न नसकेको आरोप लगाए ।
प्रकाशित मिति २०८३ भदौ ३ गते बुधबार ०३:४३
