पोखरामा कोरोनाविरुद्ध खोप लगाउनेको भीड

पोखरामा कोभिड–१९ विरुद्धको खोप लगाउनेहरुको भीड बढेको छ । सरकारले माघ ७ गतेदेखि सार्वजनिक सेवा प्रवाहमा खोप कार्ड अनिवार्य गरेसँगै कोभिड–१९ विरुद्धको खोप लगाउनेको भीड बढेको हो ।

पोखरामा विभिन्न केन्द्रहरूमार्फत खोप अभियान सञ्चालन भइरहेको छ । पोखरा महानगरपालिका-५ स्थित खोप केन्द्रका प्रमुख आशिष सुवेदीले खोप लगाउनेहरुको भीड दैनिक १५ सय जनाभन्दा बढी रहेको बताए ।

हालसम्म कुनै पनि खोप नलगाएकालाई जोन्सन एण्ड जोन्सन खोप दिइएको तथा पहिलो डोज लगाइसकेकालाई कोभिसिल्ड वा भेरोसेल कुन खोप लगाएको हो सो खोपको दोस्रो मात्रा दिइएको उनले बताए । खोप केन्द्रमा पुरुषभन्दा महिला बढी संख्यामा खोप लगाउन आएका उनले उल्लेख गरे ।

पहिले खोप लगाउन आग्रह गर्दा पनि अस्वीकार गर्नेहरू अहिले खोप लगाउन आउने गरेको उनको भनाइ छ । खोप लगाउनेको भीडले जनस्वास्थ्यको मापदण्ड तथा भौतिक दूरीसमेत कायम गर्न नसकेको दृश्य देख्न सकिन्छ ।