वडा कार्यालयले प्रत्येक दुई महिनामा दुई दिन पोखराबाटै सेवा दिन्छ
पोखरा
कास्कीको मादी गाउँपालिका–१ का आधा बढी स्थानीयको बसाइँ पोखरामा छ । पोखरामा बसेपनि उनीहरुले बसाइँसराइ भने ल्याएका छैनन् । स्थानीय तहबाट प्रदान हुुने सेवा लिन पोखराबाट सिक्लेसम्मको उकालो नचढी सुुखै थिएन ।
झन्डै ४२ किलोमिटर यात्रा गरेर वडा कार्यालयसम्म सेवा लिन जानलाई झन्झट भएपछि पोखरामै घुुम्ती सेवा दिन थालिएको छ । प्रत्येक दुुई/दुुई महिनामा दुुई दिन वडा कार्यालयका जनप्रतिनिधि र कर्मचारी पोखरामै झरेर सेवा दिन्छन्।
आइतबारदेखि मंगलबारसम्म पोखराको माटेपानीमा घुुम्ती वडा कार्यालय सञ्चालन गरियो ।
यसपालि सेवाग्राहीको बढी चाप भएपछि सेवालाई तीन दिनसम्म लम्ब्याइएको हो । जन्म, मृत्यु दर्ता, नाता प्रमाणित, सामाजिक सुरक्षा भत्ता नविकरण, तिरो तिर्नेजस्ता सेवा प्रदान गरियो । घुम्ती सेवाले गाउँ जान नपरेको खुशीमान गुरुङले बताए । ‘गाउँमा भन्दा यहाँ धेरै छन् । बसाइँसराइ गरेका छैनन् । वडा कार्यालय यहीं आएर सेवा दिदा सजिलो भयो,’ उनले भने । यो सेवालाई निरन्तरता दिन उनको सुझाव छ ।
घुम्ती सेवा दिनलाई वडाध्यक्ष र कर्मचारीसँगै खटिएकाले घुस माग्ने काम नभएको जग्गा नामसारीको सिफारिसको लागि आएका अर्का सेवाग्राहीले बताए । घुुम्ती वडा कार्यालय सुुरुआतको छोटो समयमै निकै प्रभावकारी ठहरिएको छ । समयको बचतसँगै पोखराबाट कार्यालय आउजाउको खर्च समेत जोगिएको उनको भनाइ छ । वडाले घुम्ती सेवा दिएको दोस्रो पटक हो । वडाबासीले सिंहदरबारको अधिकार गाउँमा आएको महसुस गर्न पाएका छन् ।
वडा भौगलिक हिसाबले ठूलो र विकट भएकाले जनताको माग अनुसार घुम्ती सेवा दिएको वडाध्यक्ष देवीजंग गुरुङले बताए । छिटो, छरितो र सहज तरिकाले सेवा दिन सकिन्छ भन्नेमा सचेत रहेको उनको भनाइ छ । ‘सेवा लिनलाई वडा कार्यालयमै जानुपर्छ भन्ने मान्यताभन्दा थोरै माथि उठेर जनताको सेवामा घुम्ती सेवा चलाएका छौं,’ उनले भने । वडा सरकार रहेको महसुस गराउन आफू प्रतिबद्ध रहेको उनी सुनाउँछन् ।
मादी गाउँपालिका वडा नम्बर १ को कार्यालयले सुुरु गरेको घुुम्ति सेवा प्रसंशनीय छ । भौगलिक रुपमा ठूला र विकट अन्य वडाले पनि यसको सिको गर्न सकेमा सिंहदरबारको अधिकार गाउँमा आएको जनताले महशुुस गर्न पाउने थिए ।
प्रकाशित मिति २०७९ भदौ २८ गते मंगलबार ०७:४१
