पोखरा
चीनको प्रमुख चार परम्परागत पर्व मध्यको एक हो, ड्रागन बोट रेस फेस्टिबल ।
परम्परागत चिकित्सा र स्वास्थ्य उत्सवको रुपमा मनाईने ड्रागन बोटरेस फेस्टिबल पोखरामा सुरु भएको छ ।
चीनसँगै मलेसिया, इन्डोनेसिया, सिंगापुर र ताइवानमा मनाइने यो फेस्टिबल दक्षिण एसियामै पहिलोपटक पोखरामा मनाइएको हो ।
दुई दिन चल्ने फेस्टिबलमा शुक्रबार उद्घाटनसँगै पहिलो चरणको प्रतिस्पर्धा समेत भएको छ ।
फेस्टिबलमा संस्कृति, पर्यटन तथा नागरिक उड्डयनमन्त्री सुदन किराँती र नेपालका लागि चिनियाँ राजदूत छन् सोङ, पर्यटन मन्त्रालयका सचिव सुरेश अधिकारी, पोखरा महानगरपालिकाका मेयर धनराज आचार्य र चिनको लिन्जी शहरका प्रमुख, उपप्रमुख लगायत सहभागी भए ।
‘नेपाल–चीन फ्रेन्डसीप ड्रागन बोटरेस’ को २ सय र ५ सय मिटर दूरीको पहिलो चरणको खेल भएको छ ।
प्रतियोगितामा सिचुवान ड्रागन बोट, युवान ड्रागन बोट, एसजी ड्रागन बोट (सिंगापुर), चाइना–नेपाल फ्रेन्डसीप ड्रागन बोट (पोखरा), नारा ड्रागन बोट (नेपाल), एनआरिसए ड्रागन बोट (नेपाल), फेवा ड्रागन बोट र पोखरा महानगर ड्रागन बोटले प्रतिस्पर्धा गरे ।
२ सय मिटरमा सिचुवान, नारा, युनान र एनआरिसए ड्रागनबोट दोस्रो चरण प्रवेश गरेका छन् । ५ सय मिटरको प्रतिस्पर्धाबाट पनि सिचुवान, नारा, युनान र एनआरिसए नै दोस्रो चरणमा प्रवेश गरेका हुन् ।
शनिबार फाइनल प्रतिस्पर्धा हुनेछ ।
नेपाल पर्यटन बोर्ड, चिनियाँ दूतावास र पोखरा महानगरपालिकाले फेस्टिबलको आयोजना गरेको हो ।
पोखरा पर्यटन परिषद् र चाइना ओभरसिज एसोसिएसनले पनि सहकार्य गरेको छ ।
तस्बिरहरूः विनाेद ढुंगाना/पब्लिक फाेरके टिभी
