पाेखरा ।
गण्डकी प्रदेशमा यस वर्षकाे मनसुनजन्य विपद्का घटनामा परी अहिलेसम्म ३८ जनाको मृत्यु भएको छ ।
प्रदेशभर बाढी पहिरोलगायतका मनसुनजन्य विपदमा परेर ३८ जनाले ज्यान गुमाउनु परेकाे प्रदेश प्रहरी कार्यालयले जनाएको छ । ज्यान गुमाउनेमा २१ महिला र १७ जना पुरुष रहेकाे प्रहरीले उल्लेख गरेकाे छ ।
याे अवधिमा ८२ वटा मनसुनजन्य विपद्का घटना भएका छन् । सबैभन्दा बढी कास्कीमा पहिरोमा परी १४ जनाको मृत्यु भएको कार्यालयका प्रवक्ता एवं प्रहरी वरिष्ठ उपरीक्षक रवीन्द्र रेग्मीले जानकारी दिए ।
उनका अनुसार मनसुनी विपद्मा परी स्याङ्जामा सात, लजमुङमा पाँच, तनहुँमा चार, बागलुङमा तीन, म्याग्दीमा दुई, पर्वतमा दुई र नवलपुरमा एकजनाको मृत्य भएको हो ।
मनसुनजन्य विपद्का घटनामा आठ महिला र १७ पुरुष गरी २५ जना घाइते र ७६ जना विस्थापित भएकाे रेग्मीले बताए । विपदमा परेर “एकानब्बे पशुचौपाया र छ सय ९० पंक्षीको मृत्यु भएको छ भने विपद्का कारण झण्डै दुई करोड बराबरको भौतिक क्षति भएको छ”, उनले भने ।
प्रदेशमा सबैभन्दा बढी कास्कीमा २३ , स्याङ्जामा १२, पर्वतमा १०, नवलपुरमा छ, बागलुङमा चार, लमजुङ आठ, मनाङमा एक, म्याग्दीमा आठ र तनहुँमा आठ विपद्का घटना भएका छन् ।
यसैबीच, केही दिनयता निरन्तर वर्षा भइरहेकाले सतर्कता अपनाउन प्रहरीले सर्वसाधारणमा अनुरोध गरेको छ ।
प्रकाशित मिति २०८१ असार २८ गते शुक्रबार ०३:५०
