काभा पुरुष भलिबल च्याम्पियनपिस : नेपालले आज घरेलु टोली पाकिस्तानसँग खेल्दै

पोखरा ।

पाकिस्तानमा जारी सेन्ट्रल एसियन भलिबल एसोसिएसन (काभा) पुरुष भलिबल च्याम्पियनपिसमा नेपालले आज घरेलु टोली पाकिस्तानसँग खेल्दैछ ।

खेल नेपाली समयअनुसार बेलुका पौने ६ बजे सुरु हुनेछ । पछिल्ला दुई खेलमा पराजित नेपाली टोली आज पहिलो जितको लक्ष्यमा छ ।

यसअघिका खेलमा नेपाल क्रमशः कजाखस्तान र श्रीलंकासँग समान ३–२ सेटको नतिजामा पराजित भएको थियो ।

नेपाल दुई अंकसहित तालिकाको अन्तिममा छ । घरेलु टोली पाकिस्तान दुई खेलमा विजयी हुँदै छ अंकका साथ तालिकाको शीर्ष स्थानमा रहेको छ ।

सिंगल राउन्ड रोविन लिगपछि शीर्ष चार टोली सेमिफाइनलमा प्रवेश गर्नेछन् ।शीर्ष चारमा अटाउन नसक्ने टोलीले पाँचौं स्थानका लागि प्रतिस्पर्धा गर्नेछन् ।

सेमिफाइनल १ मा शीर्ष र चौथो स्थानमा रहने टोलीबीच भिडन्त हुनेछ । त्यस्तै सेमिफाइनला २ मा दोस्रो र तेस्रो स्थानमा रहने टोलीले एकअर्कासँग खेल्नेछन् ।

पाकिस्तानपछि नेपालले आइतबार बंगलादेश र सोमबार पहिलो चरणको अन्तिम खेलमा उज्वेकिस्तानसँग खेल्नेछ ।