कर्णाली प्रदेश सरकारविरुद्ध अविश्वास प्रस्ताव दर्ता

काठमाडाै । कर्णाली प्रदेश सरकारविरुद्ध सत्तारुढ दलकै सांसदहरुले अविश्वास प्रस्ताव दर्ता गराएका छन् । आइतबार कर्णाली प्रदेशका मुख्यमन्त्री महेन्द्रबहादुर शाहीविरुद्ध सत्तारुढ नेपाल कम्युनिस्ट पार्टी (नेकपा) कै प्रदेशसभासदले अविश्वासको प्रस्ताव दर्ता गराएका हुन् ।

प्रदेश सांसद यमलाल कडेलसहितका १८ जना सांसदहरुले हस्ताक्षरसहित संसदीय दलका प्रमुख सचेतक गुलाबजङ्ग शाहलाई बुझाएका छन् । त्यसपछि सांसदहरुको टोली आइतबार दिउँसो नै प्रदेशसभा सचिवालय पुगेर प्रस्ताव दर्ता गराएको कडेलले जानकारी दिए ।

प्रस्तावमा सचेतक शाह सहित उपसभामुख पुष्पा घर्तीमगर, यामलाल कँडेल लगायतको हस्ताक्षर रहेको छ । शाही मुख्यमन्त्री निर्वाचित भएपछि पार्टी तथा कामकारवाही फितलो बन्दै गएको, पार्टीको प्रभावकारितामा कमी आएको लगायतका आरोप लगाइएको छ ।

हस्ताक्षर गर्नेमा पूर्व एमालेका १३ र पूर्वमाओवादीका ५ जना सांसद छन् । कर्णाली प्रदेशसभामा नेकपाका ३३ जना सांसद रहेका छन् ।