पोखरा । गत २७ र २८ मंसिरमा कास्कीको लान्द्रुकमा ‘हनी हन्टिङ फेस्टिबल’ भएको थियो । कमै नेपालीले देखेको भीर मौरीको मह सिकार हेर्न विदेशीले भने खुबै चासो दिएको पाइयो । कोही त्यत्ति हेर्न लाखौँ खर्च गरेर नेपाल आएका थिए भने कसैले आफ्नो निर्धारित पदयात्रा नै रद्द गरे ।
दक्षिण अफ्रिकादेखि नेपाल
दक्षिण अफ्रिकाका बेनार्ड लामेर्डिङ र केल्भिन कुइट २२ मंसिर (११ डिसेम्बर)मा नेपाल आएका थिए । हनी हन्टिङ हेर्न एक हप्तालाई नेपाल आएका उनीहरु शनिबार स्वदेश फर्किएका छन् ।
युट्युबको भिडियो देखेपछि उनीहरुलाई प्रत्यक्ष हेर्न मन लागेको रहेछ । ‘दुई वर्षअघि हनी हन्टिङ गरेको डकुमेन्ट्री देखेको थिएँ । त्यसपछि मैले त्यो भिडियो साथीहरुलाई पठाएँ,’ कुइटले सुनाए, ‘साथीले एकपटक जाऊँ भनेपछि हामी आयौँ । हनी हन्टिङ गर्ने त सत्य रहेछ !’
दुवै जना एक हप्ताअघि काठमाडौँबाट पोखरा, धम्पुस हुँदै लान्द्रुक पुगेका थिए । भिडियोमा देखेको मह सिकार आफ्नै अगाडि देख्न पाउँदा कुइट आफूलाई भाग्यमानी ठान्छन् । ‘म अफ्रिका बाहिर पहिलोपटक नेपाल आएको हो र हनी हन्टिङ पनि पहिलोपटक देख्न पाएँ,’ कुइटले भने, ‘मैले त सपना देखेकोजस्तै अनुभव गरेँ । मह झिक्नलाई मान्छे भीरमा झुण्डिएको देख्दा त उनीहरू ‘पागल’ नै रहेछन्जस्तो लाग्यो । आफ्नै आँखाअगाडि त्यस्तो देख्न पाउने म निकै भाग्यमानी हुँ ।’
दुई साथीलाई खेनपालुङ एड्भेन्चरले लान्द्रुकसम्म पुर्याएको हो । एडभेन्चरका गाइड दावा शेर्पाले बताएअनुसार उनीहरु एक वर्षअघि नै नेपाल आउने योजनामा थिए । ‘नेपाल आउने भनेर दुई वर्ष पहिला नै पक्का भएको थियो । २०२१ मा कोरोना भाइरसले गर्दा आउन पाएनन् । हनी हन्टिङ हेर्न र मह चाख्न यो वर्ष एक हप्तालाई नेपाल आएका हुन्,’ उनले सुनाए ।
नेपाल आउँदादेखि फर्किंदासम्मका सबै गतिविधि उनीहरूको क्यामेरामा कैद छन् । ती तस्वीरहरू साथीभाइलाई देखाउने लामेर्डिङको सोच छ । ‘मैले धेरै फोटो खिचेको छु । गाउँमा दिएको प्रमाणपत्र पनि साथीहरूलाई देखाउँछु,’ लामेर्डिङले भने । मह सिकार हेर्न पुगेका दुवैले ८० हजार रूपैयाँ फेस्टिबल आयोजकलाई सहयोग गरेका थिए ।
जसले पदयात्रा नै रद्द गरिन्
यूरोपियन देश चेक रिपब्लिककी मार्टिना स्ट्रेइजकोभा एक महिनाअघि नेपाल आएकी थिइन् । पदयात्रालाई मात्र नेपाल आएकी उनले भीर मौरीको मह सिकार गरेको देख्न पाइन् ।
अन्नपूर्ण आधार शिविर, पुनहिल पुगेर फर्केपछि २४ मंसिरमा मार्टिना लान्द्रुक पुगेकी थिइन् । २५ मंसिरमा मर्दी हिमाल पदयात्रामा निस्किने योजना थियो । तर, हनी हन्टिङ हेर्न उनले आफ्नो तीन दिनको मर्दी हिमाल पदयात्रा रद्द गरेर लान्द्रुकमै बसिन् । उनी शुक्रबार स्वदेश फर्किएकी छन् ।
अक्करे भीरमा मान्छे झुण्डिएको देख्दा उनी अचम्मित रहिन् । ‘मेरो नजरमा मह सिकार गर्नेहरु निकै बहादुर रहे किनकि म त त्यो गर्न सक्दिनँ । सिकारमा प्रयोग हुने डोरी, भाँडा र सामग्री पनि देख्न पाएँ,’ उनले अनुभव सुनाइन् ।
योपटक मह सिकार हेर्न रद्द गरेको मर्दी हिमाल पदयात्रा गर्न मार्टिना अर्को वर्ष अक्टोबरमा नेपाल आउँदै छिन् ।
प्रकाशित मिति २०७९ पुस ३ गते आइतबार ०६:४३
