पोखरा
कास्कीको मादी गाउँपालिकाले आफ्नो क्षेत्रमा गोरु संरक्षण गर्ने नीति ल्याएको छ ।
बिहीबार आर्थिक वर्ष ०८०÷८१ को नीति तथा कार्यक्रम प्रस्तुत गर्दै अध्यक्ष देवीजंग गुरुङले गोरु संरक्षण गर्ने र हलगोरु पाल्ने किसानलाई अनुदान दिने जानकारी दिएका हुन् ।
कमजोर किसान संरक्षण अभियानअन्तर्गत पालिकाले गोरु पालनका लागि अनुदान दिने भएको हो ।
‘गोरु संरक्षण र कमजोर किसान संरक्षणअन्तर्गत हलगोरु पाल्ने कृषकलाई अनुदान दिनका लागि आवश्यक व्यवस्था मिलाइने छ,’ मादीको नीति तथा कार्यक्रममा उल्लेख छ ।
त्यस्तै, पालिकाले स्थानीय परम्परागत सीपमा आधारित कृषि उपजको पनि विविधिकरण गर्ने लक्ष्य राखेको छ ।
उक्त नीति अन्तर्गत मादीको मौलिक उत्पादनका रुपमा राडी, भांग्रा, बख्खु, गुन्द्रुकआदि ब्रान्डिङ गरेर विक्री वितरण गर्ने लक्ष्य राखेको छ ।
‘पालिकालाई स्थनीय उत्पादनतर्फ अग्रसर गराउन राडीपाखी, कम्बल, भांग्रा, स्विटर, झोला बनाउने तानहरुलाई आधुनिकीकरण गरी स्थानीय स्रोत, साधन, सीप एवं प्रविधिको प्रयोगलाई बढाइनेछ,’ आगामी आर्थिक वर्षको नीति तथा कार्यक्रममा उल्लेख छ ।
मादी गाउँपालिकाले आफ्नो क्षेत्रभित्र बिना अनुमति सञ्चालनमा रहेका व्यवसायलाई पनि अनिवार्य करका दायरामा ल्याउने घोषणा गरेको छ ।
त्यस्तै, मादी गाउँपालिकाले आफ्नो गाउँपालिकाभित्र रहेका सामुदायिक विद्यालयमा मावि तह (कक्षा १२) अध्ययन गर्ने सबै विद्यार्थीलाई पूर्ण छात्रवृत्तिको घोषणा गरेको छ । मादीले एक माविक एक उद्यम अन्तर्गत हरेक शुक्रबार ‘नो बुक, नो ब्याग’ अभियान सञ्चालन गरी व्यवहारिक शिक्षामा जोड दिने अध्यक्ष देवीजंग गुरुङले जानकारी दिए ।
पूर्णपाठ
