पोखरा
संस्कृतिविद् तथा नेपाल प्रज्ञा प्रतिष्ठानका पूर्व उपकुलपति डा जगमान गुरुङले गण्डकी प्रदेशबाट जीवको सृष्टि भएको दाबी गरेका छन् ।
राष्ट्र गौरव अभियानले आइतबार पोखरामा गरेको ‘नेपाल राष्ट्र निर्माण, राष्ट्रियता र पृथ्वीनारायण शाह’ विषयक शैक्षिक व्याख्यान कार्यक्रममा उनले त्यस्तो दाबी गरेका हुन् ।
कार्यक्रममा प्रमुख वक्ता रहेका प्राडा गुरुङले नेपालमा हिमालयको स्वरुपमा देवीदेवताको बास भएकोमात्रै दाबी गरेनन्, जीव विकास अफ्रिका नभई नेपालकै गण्डकी प्रदेशबाट भएको समेत जिकिर गरे ।
उनले जाडो ठाउँमा जीव प्रकट हुन सक्दैन भनेर अफ्रिकामा सभ्यता भएको भनेर अंग्रेजहरुले गलत इतिहास सिकाएको आरोप लगाए ।
‘…जीवको सृष्टि भएको छ, नेपालमा । नेपालमा कहाँ भोभन्दा गण्डकी प्रदेशमा भयो । मुस्ताङ जिल्लामा भयो, दामोदरकुण्डमा भयो,’ गुरुङको दाबी थियो, ‘मान्छेले गर्भधारण कहाँ गर्छ ? … पेटमा गर्छ । विश्वको गर्भधारण गर्ने दामोदरकुण्ड हो ।’
गुरुङले संसार जलमा डुबेर मासिए पनि नेपाल नमासिने दाबी गरे ।
‘नेपाल सत्यको देश हो । अघि सृष्टि पनि नेपालको हिमालबाट भएको हो, २८ औं कली नास भए पनि फेरि सृष्टि नेपालकै हिमालबाट हुन्छ,’ उनले भने ।
उनले गाईलाई १६ सय वर्षअगाडि नै राष्ट्रिय जनावर मानिएको तथ्य भेटिएको जिकिर गरेका छन् ।
राष्ट्र गौरव अभियानका संयोजक सिरोजविजय कोइरालाले गौरव गर्नुपर्ने, बुझ्नुपर्नेबेला नेपालको इतिहास पाठ्यपुस्तकबाटै हटाइएको आरोप लगाए ।
नेपाल भन्ने देश पृथ्वीनारायण शाहले दिएको बताए ।
प्रकाशित मिति २०८० भदौ २४ गते आइतबार ०५:५४
