बल्खुमा प्रहरी र दुर्गा प्रसाईंका कार्यकर्ताबिच झडप, झडपमा दर्जनाै घाइते

काठमाडौं । काठमाडौंको बल्खुमा दुर्गा प्रसाईं समूह र प्रहरीबीच झडप भएको छ ।

झडपमा परि धार्दिङ घर भएका ६० बर्षीय चिरञ्जीवी बस्नेत सख्त घाइते भएका छन् । नीजकाे उपचारका लागि काठमाडाैंस्थित केएमसी अस्पताल लगिएकाे दुर्गा प्रसाईं समूहसंग कार्यगत एकता गरेकाे लाैराे अभियानका अभियन्ता खेम तिमिल्सिनाले बताए ।

झडपमा परेर हालसम्म २६ जना घाइते भएका छन् ।

बल्खु चक्रपथमा प्रदर्शन गरिरहेकाे समूहले प्रहरी घेरा तोडेर कालीमाटीतर्फ जान खोजेपछि प्रहरीले बल प्रयोग गर्दा झडप भएकाे हाे  ।

प्रदर्शनस्थलमा दुर्गा प्रसाईंले सम्बोधन गरेपछि एक व्यक्तिले मञ्चबाटै निषेधित क्षेत्र तोडेर त्रिपुरेश्वरतर्फ जाने घोषणा गरेका थिए । त्यसपछि प्रदर्शनकारीको समूह बल्खुचोकबाट कालीमाटी हुँदै त्रिपुरेश्वर आउने सडकतर्फ अघि बढेपछि प्रहरीले बल प्रयोग गरेको हो ।

प्रदर्शनकारीलाई लखेट्न प्रहरीले अश्रुग्यास र पानीको फोहोरा हानेको छ भने प्रदर्शनकारीले प्रहरीतर्फ इँट्टा र ढुंगा हानेका छन् ।