तनहुँमा बस दुर्घटना, ३२ यात्रु घाइते

पोखरा

बिहिबार विहान तनहुँमा बस दुर्घटना हुँदा ३२ यात्रु घाइते भएका छन् । पृथ्वी राजमार्ग अन्तर्गत तनहुँको म्याग्दे गाउँपालिका–६ मौरीबजार ठूलोपहिरोमा दुर्घटना भएको हो ।

विरगञ्जबाट पोखरा आउदै गरेको बाग्मती प्रदेश ०३–००१ ख १२०६ नम्बरको यात्रुवहाक बस अनियन्त्रित भएर दुर्घटना भएको जिल्ला प्रहरी कार्यालय तनहुँका सूचना अधिकारी डिएसपी मोहनबहादुर खाँणले बताए । उनका अनुसार बस सडकबाट अन्दाजी ५६ फिट तल खसेको छ ।

घाइतेमध्य २९ जनाको तनहुँकै बेलचौतारामा रहेको जिपी कोइराला राष्ट्रिय श्वासप्रश्वास उपचार केन्द्रमा उपचार भइरहेको छ ।

२ जनालाई पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पताल र १ जनालाई मणिपाल शिक्षण अस्पतालमा थप उपचारका लागि रिफर गरिएको खाँणले जानकारी दिए ।

घाइतेमध्य १ जनाको अवस्था गम्भिर रहेको उनले बताए । १७ जना मध्यम र १४ जनाको अवस्था सामान्य रहेको छ । घाइते अधिकांश पोखराका छन् ।