हरिकृष्ण गौतम ।
म्याग्दी ।
म्याग्दीको सदरमुकाम बेनीबजारसँगै जोडिएको बराहपाखो सामुदायिक वनमा पदमार्ग निर्माण गरिएको छ ।
बेनी नगरपालिका–७ को योजना अन्तर्गत सामुदायिक वनभित्र रहेको वनभोजस्थलदेखि हुलाकचोकसम्म करिब १ सय ७० मिटर पदमार्ग निर्माण गरिएको हो ।
वनभित्र रहेको पूरानो पैदलमार्गलाई व्यवस्थित गर्न वडाको ५ लाख र जनश्रमदान ५५ हजार गरि कुल ५ लाख ५५ हजारको लागतमा निर्माण सम्पन्न भएको उपभोक्ता समितिका अध्यक्ष विष्णु प्रसाद गौतमले जानकारी दिए ।
पदमार्ग बनेपछि बिहान बेलुकी घुम्न निस्कनेलाई, वनभोजस्थलमा जाने र बराहपाखो क्षेत्रमा रहेको बेनी खानेपानीको ट्यांकी, पूरानो खानेपानीको मुल मर्मतका लागि समेत सहज भएको छ ।
वडा अध्यक्ष रमेशकुमार श्रेष्ठले पुराना पदमार्गलाई मर्मतसम्भार र नयाँ ट्रयाक खोल्ने काम पनि सँगसँगै गरिएको बताए ।
सामुदायिक वनभित्र करिब १ किलोमिटर पदमार्गको सञ्जाल बनाउने उनको भनाइ छ ।
पक्की ढलान सहितको पदमार्ग निर्माणपछि गर्मीयाम सुरु भएसँगै आगलागीको जोखिम कम गर्न समेत यसले अग्नीरेखाको काम गर्ने गरेको छ ।
बराहपाखो साामुदायिक वनमा बाक्लो मात्रामा सल्ला रहेकाले आगो छिटो फैलिन सक्ने खतरालाई समेत पदमार्गले न्यूनिकरण गर्नेछ ।
बराहपाखो सामुदायिक बनको माथिल्लो क्षेत्रमा वडा नं ८ बाट साइकल लेन ल्याउने र तल्लो क्षेत्रमा पदमार्ग बनाउने बाहेक अन्य संरचनाहरूलाई प्राथमिकता नदिइएको वडा कार्यालयले जनाएको छ ।
वनभित्र विभिन्न प्रजातिका फलफुल रोपिएको छ ।
बजार नजिकै भएकाले हुने चोरीनिकासीलाई मध्यनजर गरी नियमित बन क्षेत्रमा अनुगमन सहित कुनै संकास्पद गतिविधि देखेमा सुरक्षाकर्मी, वन कर्मचारीलाई खबर गर्ने गरेका छन् ।
यसैबीच रुपाताल एकीकृत विकास संरक्षण विकास परियोजना र खानेपानी, जलश्रोत तथा सिंचाई विकास डिभिजन कार्यालयको सहयोगमा पूरानो पोखरी र चौतारी मर्मत तथा पहिरो नियन्त्रणको काम समेत धमाधम भइरहेको छ ।
प्रकाशित मिति २०८० फागुन ५ गते शनिबार ०९:४०
