मुद्दा चलिरहेको व्यक्तिलाई गृहमन्त्री बनाएकोमा राष्ट्रिय जनमोर्चाको आपत्ति

काठमाडाैं

राष्ट्रिय जनमोर्चाबाट राष्ट्रिय सभा सदस्य तुलप्रसाद विश्वकर्माले सहकारी घोटालाको आरोपमा मुद्दा चलिरहेको व्यक्तिलाई देशको उपप्रधान एवं गृहमन्त्री बनाउने कुरा अस्वभाविक भएको बताएका छन् ।

बिहीबारको राष्ट्रिय सभा बैठकमा उनले मन्त्रिमण्डल विस्तार गर्ने क्रममा अदालतमा मुद्दा चलिरहेको व्यक्तिको मुद्दाको किनारा नलागेका व्यक्तिलाई गृहमन्त्री बनाउनुपर्ने कुरा आश्चर्यजनक रहेको बताएका हुन् । उनले प्रधानमन्त्रीले कसको दबाबमा सत्ता समीकरण परिवर्तन गरेका हुन् ? भन्दै प्रश्नसमेत गरे ।

‘मन्त्रिमण्डल विस्तार गर्ने क्रममा जुन व्यक्तिको उपर अदालतमा मुद्दा चलिरहेको छ । त्यो मुद्दाको किनारा लागेको छैन, नागरिकता, दोहोरो पासपोर्टका सवालहरु छन्’, विश्वकर्माले भने, ‘सहकारीमा घोटाला भएका मुद्दाहरु जीवितै छ । स्वयं उही व्यक्तिलाई गृहमन्त्रालय सुम्पिने काम भएको त्यो स्वभाविक रुपमा स्वीकार्न सकिने कुरा होइन । यसमा हाम्रो पार्टीको आपत्ति छ ।’