पोखरा ।
नेकपा माओवादी केन्द्रको स्थायी कमिटी बैठक आज पनि बस्दै छ ।
पार्टी केन्द्रीय कार्यालय पेरिसडाँडामा जारी बैठक आजै सक्ने तयारी गरिएको छ ।
शनिबार र आइतबार धेरै सदस्यहरुले आफ्नो धाराणा राखिसकेकोले आज समापन गर्ने तयारी गरिएको माओवादी केन्द्रले जनाएको हो ।
आजको बैठकमा महासचिव देवप्रसाद गुरुङ र वरिष्ठ उपाध्यक्ष नारायणकाजी श्रेष्ठले आफ्नो धारणा राख्दैछन् ।
बाँकी रहेका गुरुङ र श्रेष्ठले धारणा राखेपछि दस्तावेदमाथि आएको धारणाबारे पार्टी अध्यक्ष पुष्पकमल दाहाल प्रचण्डले जवाफ दिने कार्यतालिका छ ।
उनले जवाफ दिएपछि आजै बैठक समापन गरिने उपाध्यक्ष अग्निप्रसाद सापकोटाले जानकारी दिए ।
बैठकमा प्रचण्डको दस्तावेजमाथि उपमहासचिव जनार्दन शर्मा, सचिव रामकार्कीसहितका केहीले प्रश्न उठाए पनि समर्थन गरेका छन् ।
विशेष महाधिवेशनको प्रस्ताव गरेका शर्मालाई स्थायी कमिटी सदस्यहरुले आत्मालोचना गर्न सुझाव दिएका छन् ।
तर, शर्माले भने पार्टीको जनमत घट्नुमा अध्यक्ष नै पूर्ण जिम्मेवार हुने भएकाले आफूले आत्मालोचना गर्दा प्रचण्डले पनि दोषको भारी उठाउनुपर्ने बताएका थिए ।
प्रकाशित मिति २०८२ साउन २० गते सोमबार १०:३०
