काठमाडौं ।
नेपाली काँग्रेसका सांसद डा. शेखर कोईरालाले संघीय निजामति ऐनमा रहेको कुलिङ अफ पिरियडमा छेडखानी गर्ने काम नेकपा एमालेबाट भएको आरोप लगाएका छन् ।
शनिबार काठमाडौंमा आयोजित एक कार्यक्रममा बोल्दै उनले यस्तो आरोप लगाएका हुन् । उनले यसबारेमा अहिलेसम्म कुरा लुकाए पनि अब लुकाउनुपर्ने आवश्यकता नरहेको बताए ।
राष्ट्रिय सभामा एमालेका सांसदहरुले कुलिङ पिरियड हटाउनुपर्छ भनेर संशोधन प्रश्ताव हालेको उनले उल्लेख गरे ।
उनले किन संशोधन हाल्नुभयो ? भन्ने सञ्चारकर्मीहरुको प्रश्नमा एमाले सांसदहरुले माथिको निर्देशन भन्ने जवाफ दिएकाले अब लुकाउनुपर्ने जरुरी नरहेको जिकिर गरे । एमाले छल कपट गर्ने राजनीतिक दल भएको उनको आरोप छ ।
उनले भने, ‘यसमा लुकेको केही छैन, अहिलेसम्म हामीले लुकायौँ अब लुकाउनुपर्ने आवश्यकता छैन । किन छैन भने राष्ट्रिय सभामा एमालेका सांसदहरुले कुलिङ पिरियड हटाउनुपर्छ भनिकन उहाँहरुले संशोधन प्रश्ताव हालिसकेपछि किन त्यस्तो संशोधन हालेको भनेर पत्रकारले सोध्दा हामीलाई माथिको निर्देशन छ भने । एमाले त छलकपट गर्दौ रहेछ । त्यसमा पनि दुई मत छैन ।’
सांसद कोईरालाले देशमा सुशासन किञ्चित मात्रामा पनि नरहेको टिप्पणी गरे ।
देशमा भ्रष्टाचार दिन प्रतिदिन बढेर गएको पनि उनको भनाइ छ ।
प्रकाशित मिति २०८२ भदौ १ गते आइतबार ०९:१२
