काठमाडौं ।
नेपाली काँग्रेसले केन्द्रिय समितिको पूर्ण बैठकको मिति सारेर २८ गतेबाट बस्ने निर्णय गरेको छ ।
शनिबार बसेको पार्टीको केन्द्रिय कार्य सम्पादन परामर्श समितिको बैठकले यस्तो निर्णय गरेको प्रवक्ता डा. प्रकाशशरण महतले जानकारी दिए ।
केन्द्रिय समितिको बैठक यसअघि असोज २६ गतेबाट बोलाइएको थियो ।
त्यस्तै बैठकमा अधिवेशन, विधि, प्रक्रियासम्मत गर्नेबारे पनि छलफल भएको छ ।
साथै प्रतिनिधि सभाको निर्वाचन र संसद पुनःस्थापनाको विषयमा छलफल भएको प्रवक्ता महतले बताए ।
उनले केन्द्रिय समितिमा छलफल गरेर निष्कर्ष निकाल्ने जानकारी दिए । राजनीतिक मुद्दाहरुमा पनि काँग्रेसले स्पष्ट धारणा राख्ने उनको भनाइ छ ।
प्रवक्ता महतले निर्वाचनमा जाने कुरा पनि राजनीतिक दृष्टिकोणबाट जायज रहेको बताउँदै सरकारले गम्भीरतापूर्वक काम नगरेको आरोप लगाए ।
उनले गत भदौ २३ र २४ गतेको घटनालाई गहिराईमा गएर छलफल गरेको उल्लेख गरे ।
सुशासन र सामाजिक सञ्जाल खोल्ने कुरामा केन्द्रित आन्दोलन भएपनि दोस्रो दिनको आन्दोलनले जटिलता उत्पन्न गरेको उनको भनाइ छ ।
प्रवक्ता महतल यसले राष्ट्रिय र राजनीतिक दलहरुको जीवनमा पनि ठूलो असर पारेको बताएका छन् ।
प्रकाशित मिति २०८२ असोज २६ गते आइतबार ०९:०४
