काठमाडौँ ।
नेकपा एमालेको अध्यक्षमा केपी शर्मा ओली निर्वाचित भएका छन् । काठमाडौँमा सम्पन्न एघारौँ महाधिवेशनबाट ओली एक हजार ६३३ मतसहित तेस्रो पटक अध्यक्षमा निर्वाचित भएका हुन् । उनका एकमात्र प्रतिष्प्रर्धी ईश्वर पोखरेलले ५६४ मत प्राप्त गरे। उपाध्यक्षमा पृथ्वी सुब्बा गुरुङ, बिष्णु पौडेल, रामबहादुर थापा बादल, गोकर्ण विष्ट, रघुजी पन्त निर्वाचित भएका छन्।
महासचिवमा शंकर पोख्रेल १ हजार २१८ मत सहित विजयी भए उनका प्रतिष्प्रर्धी सुरेन्द्रप्रसाद पाण्डेले ९९९ मत प्राप्त गरे। यस्तै, उपमहासचिवमा लेखराज भट्ट, योगेश भट्टराई र रघुवीर महासेठ विजयी भएका छन्। भट्टले एक हजार ४५२, महासेठले एक हजार ३६८ र भट्टराईले एक हजार ३४८ मत प्राप्त गरे।
अध्यक्ष ओली २०७८ मंसिरमा चितवनमा आयोजित १०औँ महाधिवेशनबाट दोस्रो कार्यकालका लागि अध्यक्षमा निर्वाचित भएका थिए । उक्त महाधिवेशनमा ओलीले १ हजार ८३७ मत प्राप्त गर्दा उनका प्रतिष्प्रर्धी भीम रावलले २२३ मत पाएका थिए। २०७१ सालमा भएको एमालेको नवौँ महाधिवेशनबाट माधवकुमार नेपाललाई ४६ मतान्तरले हराउँदै ओली पहिलोपटक अध्यक्ष निर्वाचित भएका थिए ।
एमाले नेतृत्वका लागि यस पटक ओली र पोखरेल प्यानल बनाएर प्रतिस्पर्धामा उत्रिएका थिए। पदाधिकारीमा पनि अधिकांश ओली प्यानलका उम्मेदवार विजयी भएका छन्।
बिहीबार बिहान सम्पन्न मतदानमा दुई हजार २२७ जनाले मतदान गरेका थिए। ३६ प्रतिनिधि मतदानमा अनुपस्थित भएका थिए। महाधिवेशनमा दुई हजार २६३ प्रतिनिधि मतदाता रहेका थिए।
मतदानमा ८० वटा विद्युतीय भोटिङ मेसिन प्रयोग गरिएका थिए।
प्रकाशित मिति २०८२ पुस ३ गते बिहीबार ०३:१७
