पोखरा ।
नेकपा (एमाले)मा आवद्ध युवाहरुको संगठन राष्ट्रिय युवा संघ, नेपालले सबै निर्वाचन क्षेत्रमा निर्वाचन परिचालन कमाण्ड बनाउने भएको छ ।
सोमबार काठमाडौंमा पत्रकार सम्मेलन गरी केन्द्रमा अध्यक्ष माहाराज गुरुङको कमाण्डमा ५०१ जना केन्द्रिय निर्वाचन परिचालन कमाण्ड र सबै निर्वाचन क्षेत्रमा पनि एमालेको पक्षमा जनमत बढाउने गरी निर्वाचन परिचालन कमाण्ड बनाउने निर्णय गरिएको जानकारी गराएको हो ।
आम मतदातको सुरक्षालाई समेत ध्यानमा दिएर सबै निर्वाचन क्षेत्रमा निर्वाचन परिचालन कमाण्ड बनाउने निर्णय गरिएको अध्यक्ष गुरुङले बताए ।
उनले भने,‘केन्द्रमा संगठनका अध्यक्ष कमरेड माहाराज गुरुङ्गको नेतृत्वमा ५०१ सदस्यीय केन्द्रीय निर्वाचन परिचालन कमाण्ड बनाएको छ । प्रदेशगत रुपमा मातहतका निर्वाचन परिचालन कमाण्डहरुलाई संयोजन र नेतृत्व गर्ने गरि पदाधिकारी र सचिवालय सदस्यहरुलाई जिम्मेवारी प्रदान गरेको छ । यसका साथै १६५ वटै प्रतिनिधिसभा निर्वाचन क्षेत्रमा निर्वाचन परिचालन कमाण्ड बनाउने निर्णय भएको छ । बैठकले उक्त कमाण्डमा संगठनद्वारा तोकिएको केन्द्रिय सदस्यको नेतृत्वमा उक्त निर्वाचन क्षेत्र अन्तर्गत मतदान केन्द्र भएका सगठनका केन्द्रीय निकाय तथा केन्द्रीय विभागका सदस्यहरु र सम्पूर्ण मातहत कमिटी ( प्रदेश कमिटी, जिल्ला कमिटी, पालिका कमिटी, बडा कमिटी र टोल कमिटी) का पदाधिकारी तथा सदस्यहरु रहने निर्णय गरेको छ। बैठकले प्रतिनिधिसभा निर्वाचन परिचालन कमाण्ड अन्तर्गत ६७४३ वटै वडामा बडा कमाण्डर र १०९६७ वटै बुथमा बुध कमाण्डर तोकेको छ ।’
संघले सबै बुथहरुमा पनि त्यसको संरक्षण गर्नेगरी कमाण्डरहरु तोक्ने पनि जनाएको छ ।
प्रकाशित मिति २०८२ माघ २० गते सोमबार ०४:३६
