मतपेटिका मतगणना स्थलसम्म ल्याउन नसक्दा गोरखा –१ मा मतगणना अनिश्चित

गोरखा ।

गोरखा क्षेत्र नम्बर–१ मा मतगणना अनिश्चित बनेको छ ।

चुमनुब्री गाउँपालिकाका ४ वडाका १४ मतदान केन्द्रका मतपेटिका सदरमुकामस्थित मतगणना स्थलसम्म ल्याउन नसक्दा मतगणना सुरु हुन सकेको छैन ।

नेपाली सेनाको हेलिकोप्टरले शुक्रबार दुई पटक गरेर केही मतपेटिका ल्याए पनि साँझपख मौसम खराब भएपछि तेस्रो उडान हुन नसक्दा प्रक्रिया लम्बिएको हो ।

बिही, ल्हो, प्रोक र सिर्दिबासका १४ मतदान केन्द्रका मतपेटिका अझै ल्याउन बाँकी रहेको बताइएको छ ।

मौसम अनुकूल भए मात्र हेलिकोप्टरबाट मतपेटिका ल्याइने र मौसम सुधार नभए भोलिसम्म पनि प्रक्रिया ‘होल्ड’ हुन सक्ने जनाइएको छ ।

यस क्षेत्रमा नेपाली कांग्रेसका प्रेमकुमार खत्री, नेकपाका हरिराज अधिकारी, नेकपा एमालेका रामचन्द्र लामिछाने र रास्वपाका सुदन गुरुङलगायत उम्मेदवार प्रतिस्पर्धामा छन् ।

उता गोरखा–२ मा भने मतगणना सुरु भइसकेको छ ।