पोखरा
पोखरा महानगरपालिकाले सयपत्री फूलको मूल्य तोकेको छ । बाहिरबाट फूलमाला आयतमा प्रतिबन्ध लगाएको महानगरपालिकाले स्थानीय उत्पादन सयपत्री फूलको मूल्य तोकेको हो ।
पोखरा महानगरपालिकाको आर्थिक विकास महाशाखा, पुष्प व्यवसायी संघ कास्की, कृषि सञ्जाल, सयपत्री फूल उत्पादक कृषक र वितरकको संयुक्त बैठकले सयपत्री फूलको दररेट निर्धारण गरिएको छ ।
फूलको ग्रेडिङ अनुसार फरक मूल्य निर्धारण गरेको महानगरको आर्थिक विकास महाशाखा प्रमुख मनहर कडरियाले बताए ।
उनका अनुसार ‘ए’ ग्रेडको सयपत्री फूलको थुंगालाई ५ रुपैयाँ मूल्य निर्धारण गरिएको छ । प्रति मालाको २ सय रुपैयाँ मूल्य तोकिएको छ । ‘ए’ ग्रेडको थुंगा १५ देखि २० ग्रामको हुनेछ ।
१० देखि १५ ग्राम तौल भएको थुुंगालाई ‘बि’ ग्रेडमा वर्गीकरण गरिएको छ । प्रति थुंगाको ४ रुपैयाँ र मालाको १८० रुपैयाँ मूल्य निर्धारण गरिएको हो ।
५ देखि १० ग्राम तौल भएको ‘सि’ ग्रेडको थुंगालाई २ रुपैयाँ र मालाको १५० रुपैयाँ निर्धारण गरिएको छ । प्रतिकेजीको ४ सय रुपैयाँ मूल्य निर्धारण गरिएको कडरियाले जानकारी दिए ।
पोखरा महानगरपालिकाले सघाएर १६० किसानले सयपत्री फूलखेती गरेको उनले बताए । ‘त्यसैको हाराहारीमा किसानले आफैंले खेती गर्नुभाछ’, उनले भने, ‘४० बढी नर्सरीले पनि फूलखेती गरेका छन् ।’
पोखरामा झन्डै ३ सय रोपनी क्षेत्रफलमा सयपत्री खेती भएको छ ।
पोखरामा वार्षिक झन्डै ४ करोड रुपैयाँभन्दा बढीको फूलको कारोबार हुने तथ्यांक छ । त्यसको करिब ४० प्रतिशतभन्दा बढी फूल आयत हुन्छ ।
प्रकाशित मिति २०८० कात्तिक २२ गते बुधबार ११:२६
