तनहुँ घाँसीकुवाको पहिरो पन्छाउने क्रम जारी, अझै केही समय लाग्ने

तनहुँ

तनहुँको घाँसीकुवामा खसेको पहिरोको कारण हिजो साँझदेखि अवरुद्ध पृथ्वीराजमार्गको दमौली–डुम्रे खण्ड अझै सुचारू हुन सकेको छैन । आज बिहानदेखि नै पहिरो पन्छाउने काम भैरहेकोे भएपनि अग्लो भिरालो जमिनबाट पहिरो खस्ने क्रम चलिरहेकोले अझै केही घण्टा समय लाग्ने देखिएको छ । पहिरो पन्छाउन सेना, प्रहरी, मुग्लिन पोखरा सडक आयोजनाका मेसिन तथा जनशक्ति खटिएका छन् ।

पृथ्वीराजमार्ग घाँसीकुवामा अवरुद्ध बनेपछि डुम्रेबाट लमजुङ हुँदै पोखरा निस्कने तथा घाँसीकुवाबाट नै रानीगाउँ हुँदै तालघरे दमौली निस्कने वैकल्पिक सडक प्रयोग गरिएको छ । यद्यपि ती सडकहरूमा पनि सवारी आवागमन सहज छैन । अधिकांश कच्ची सडक भएकाले हिलोमा सवारी फस्ने लगायतका कठिनाई देखिएको छ ।