गोरखा ।
गोरखामा पौडी खेल्ने क्रममा एक किशोरको ज्यान गएको छ ।
बारपाक सुलकोट गाउँपालिका–४ निवासी १५ वर्षीय सिजल गुरुङको डुबेर मृत्यु भएको जिल्ला प्रहरी कार्यालय गोरखाका सूचना अधिकारी प्रहरी नायब उपरीक्षक (डीएसपी) इन्द्र प्रसाद सुवेदीले जानकारी दिएका छन् ।
घटना गोरखा जिल्लाको अजिरकोट गाउँपालिका–५ स्थित दरौदी नदीमाथि बनेको कालिका हाइड्रोपावरको चेक ड्याममा बिहीबार दिउँसो भएको हो ।
गर्मीका कारण दिउँसो करिब साढे १२ बजे सिजल पौडी खेल्न ड्याममा हामफालेका थिए । तर, पानीमा हामफालेपछि उनी तत्कालै बेपत्ता भएका थिए ।
डुबेको केही समयपछि घटनाको जानकारी पाउने बित्तिकै प्रहरी घटनास्थलमा पुगेर खोजी कार्य सुरु गरेको थियो । प्रहरीका अनुसार अनुसन्धानका क्रममा सिजलको ज्यान डुबेर गएको पुष्टि भएको हो ।
प्रहरीले घटनाको थप अनुसन्धान जारी राखेको जनाएको छ ।
प्रकाशित मिति २०८२ जेठ २ गते बिहीबार ०६:२९
