सवारी चालक अनुमति पत्र कास्कीका कार्यालय सहयोगी नियन्त्रणमा

पोखरा ।

अख्तियार दुरूपयोग अनुसन्धान आयोगले यातायात व्यवस्था कार्यालय सवारी चालक अनुमति पत्र कास्कीका कार्यालय सहयोगी दिपक पौडेललाई नियन्त्रणमा लिएको छ ।

पोखराबाट खटिएको अख्तियारका टोलीले पौडेललाई ७ हजार घुससहित मंगलबार नियन्त्रणमा लिएको हो ।

उनले सवारी चालक अनुमतिपत्रको अनलाइन फाराम भरिदिने र लिखित परीक्षा उत्तीर्ण गराई ट्रायल पास गरिदिने भन्दै सेवाग्राहीसँग घुस मागेको आरोपमा नियन्त्रणमा लिइएको अख्तियारको प्रवक्ता राजेन्द्रकुमार पौडेलले जानकारी दिए ।

उजुरीका आधारमा अख्तियारको टोलीले कार्यालय सहयोगी पौडेललाई सेवाग्राहीसँग घुस लिइसकेको अवस्थामा पक्राउ गरेको प्रवक्ता पौडेलले बताए ।

पक्राउ परेका दिपकलाई नियन्त्रणमा लिई थप अनुसन्धान भईरहेको अख्तियारले जनाएको छ ।