पोखरा ।
नेपाली कांग्रेस गण्डकी प्रदेश समितिको आयोजनामा शनिबार पोखरामा विशेष भेला सम्पन्न भएको छ ।
मुलुकको वर्तमान परिस्थिति, नेपाली कांग्रेसको जिम्मेवारी र १५ औँ महाधिवेशन सम्बन्धमा भेलाको आयोजना गरिएको हो ।
सभामा प्रदेश, जिल्ला र स्थानीय तह समिति, महासमिति सदस्य, महाधिवेशन प्रतिनिधिहरुको सहभागिता रहेको थियो ।
भेलामा बोल्दै सहभागिले समयमा नियमित महाधिवेशन गर्नुपर्नेमा जोड दिए । बक्ताहरुले पार्टीमा आन्तरिक कलह व्यवस्थापन गरेर महाधिवेशन र निर्वाचनमा केन्द्रीत हुनुपर्ने अन्यथा पार्टी कमजोर हुने धारणा राखे ।
विशेष भेलामा सहभागिले चार वर्षको कार्यकाल पुरा भएकाले विधानको आडमा म्याद थप नगर्न पनि केन्द्रीय समितिको ध्यानाकर्षण गराए ।
गण्डकी प्रदेश सभापति शुक्रराज शर्माको अध्यक्षतामा भएको कार्यक्रममा पूर्वमन्त्री यज्ञबहादुर थापा पनि सहभागि भएका थिए । केन्द्रीय समितिको एक महिना लामो चलेको बैठकले कुनै निकास दिन नसकिरहेको अवस्थामा तल्लो तहदेखी नेतृत्वलाई महाधिवेशन गर्नका लागि दवाव सृजना गर्न दबाबमुलक कार्यक्रम हुदै आएका छन् ।
प्रकाशित मिति २०८२ कात्तिक ३० गते शनिबार ०८:०४
