काठमाडौं ।
नेपालको प्रहरीको तथ्याङ्क अनुसार महिलामाथि हुने यौन हिंसाको ९१ प्रतिशत घटना आफन्त तथा नातेदारबाट हुने गरेको पाइएको छ ।
महिला हिंसाविरुद्धको १६ दिने अभियानका क्रममा प्रहरी प्रधान कार्यालयले आज सार्वजनिक गरेको वार्षिक तथ्यपत्र अनुसार ९१ प्रतिशत यौनजन्य हिंसा आफन्त र नातेदारबाटै भएको पाइएको हो ।
तथ्यपत्र सार्वजनिक गर्दै नेपाल प्रहरीको अपराध अनुसन्धान विभागकी प्रहरी उपरीक्षक बसुन्धरा खड्काले घरेलु हिंसाको दर पनि अत्यधिक रहेकाले घरपरिवारबाट सुधार हुन आवश्यक रहेको बताए ।
यस्तै कार्यक्रममा नेपाल प्रहरीका महानिरीक्षक दानबहादुर कार्कीले हिंसाका घटना बढ्नुका साथै उजुरी दिने क्रम पनि बढेको उल्लेख गरे ।
अनुसन्धान र कारबाही जारी रहे पनि अपराधका घटनाको गति नरोकिनु चिन्ताजनक रहेको भन्दै प्रहरीका महानिरीक्षक कार्कीले शिक्षा प्रणालीमा सभ्यताको विषयसम्बन्धी पाठ्य सामग्री राख्न जरुरी देखिएको जिकिर गरे ।
कार्यक्रममा स्वास्थ्य सेवा विभागकी उपसचिव कविता अर्यालले महिला हिंसाबाट कुनै प्रदेश र कुनै उमेर समूह अछुतो नरहेको बताउँदै नातागोताबाटै हिंसा हुनु अति चुनौतीपूर्ण विषय भएको उल्लेख गरिन् ।
अहिले पनि २८ प्रतिशत मात्रै पीडित महिला ‘हिंसा भयो’ भनेर मद्दत माग्न आउने गरेका जनाउँदै उनले बाँकी समाजमा लुकेर रहनु डरलाग्दो विषय भएको बताएकी छन् ।
प्रकाशित मिति २०८२ मंसिर १५ गते आइतबार ०७:३९
