विभागीय टिम एपीएफलाई पहिलो हाफमा २ गोलको अग्रता

पोखरा
साविक विजेता एपीएफ फुटबल क्लब पोखरामा जारी आहारारा पोखरा गोल्डकपको पहिलो क्वाटरफाइनल खेलमा २ गोलले अग्रता लिएको छ । पोखरा रंगशालास्थित फुटबल मैदानमा भइरहेको खेलमा धरान फुटबल क्लबविरुद्ध पहिलो हाफमै २ गोलले अग्रता लिएको हो ।

एपीएफले पहिलो हाफको ३६ र ३९ औं मिनेटमा गोल गरेको थियो । एपीएफको अग्रतामा बिकु तामाङ र युवराज खड्काको गोगदान रह्यो ।

खेलको ३६ औं मिनेटमा मैदानको मध्यभागबाट बुद्धिमान राईले दिएको लामो पासलाई क्यास गर्दै बिकु तामाङले सुन्दर फिनिसिङ दिएका हुन् ।

खेलको ३९ औं मिनेटमा एपीएफका प्रदीप लामाले विपक्षी बायाँ डिबक्स क्षेत्रबाट युवराज खड्कालाई पास दिए । तर, उनले तत्कालै बिकु लामालाई पास दिए । लामाले गोल पोस्टमा प्रहार गरेको बल धरानका गोल रक्षक सौरभ बरालको हातमा ठोक्किँदै रिबाउन्ड भएको थियो ।

सोही रिबाउन्ड बललाई खड्काले गोलमा परिणत गरेका हुन् ।